Häämetg’fihle *)

Von Albert H. Keil

1620 – fuchzeh(n) Johr:
Vun Soldade b’soffe gemacht
un ä(n)fach mitgenumme
vun Spanje in die Palz.
Häämweh? B’schdimmt!

‘s Johr druff an de Woistrooß abg’haue.
Unnerg’schlubbt in Diddesfeld.
Hochzich, Kinner, Enkel.
Nooch dreißich Johr Kriech
endlich Friede – un Häämetg’fihle.

1953 – zwansich Johr:
Mit nix ausgewannert
nooch Auschdralje.
Fraa, Kinner, Enkel.
Häämweh? Velleicht!

Milljonär worre mit ‘re Metz.
G’sundheit gedauscht geche Wohlstand.
In de letschde Läwensjohre
känn B’suuch mäh in de Palz.
Fär „Down under“ Häämetg’fihle.

2020 – iwwer sibbzich:
Umgezoche vun de Palz
an de Rand vun Hamburch.
Naji Wohnung, naji Sprooch.
Häämweh? Awwer sicher!

Als alder Baam ve’planzt.
Die Dochder schunn lang dort.
Die Fraa mitgenumme.
Pälzer Mundart gäbbt’s digidal.
Wärklich Häämetg’fihle!

*) © 2021 by Verlag PfalzMundArt, Dirmstein

Veröffentlicht in:
Literarischer Verein der Pfalz e. V. (Hrsg.): Neue Literarische Pfalz (NLP), Nr. 47 (2021).
Landau 2021, S. 41.