Hehjefliech *)

Von Albert H. Keil

zum 25-jährigen Abiturjubiläum 1991
der Abgangsklasse 1966b am
Kurfürst-Ruprecht-Gymnasium Neustadt

‘s war sexesechzich – Korzschuljohr:
Wie hänn mit Känne, G’schick un Kraft
In Naistadt ‘s Abidur märr g’schriwwe!
Fascht määnscht jo schunn, ‘s wär nimmi wohr:
Grad fuchzeh(n) hänn däss Zaichnis g’schafft,
Wu vun zwä Noochkriegsklasse war’n gebliwwe.

Endlich mol ferdich! Was die Alde
Vorher gerode hänn un g’saacht –
Ob Bolledik, ob Alldaagssache –,
Däss hänn fär iwwerholt märr g’halde,
Do driwwer hämmer bloß gelacht.
Märr wollden wärklich alles bessermache!

Glaabt ännerm „Circus Ruprecht“ hait –
So unser Bierzeidung hot g’hääße –,
Misst uns die Welt inzwische kenne,
Dann wär’märr hochberihmde Lait.
In Illuschtrierde kännt märr’s läse,
Am Bildschärm deet märr unser Name nenne:

Nobelpreis sähnem Teddy ähnlich,
Drei kimmren sich ums Schulsischdääm,
De Pitt die Wärtschaft bringt ins Lot,
Fär Abrischdung sorch ich persänlich,
De Spross macht’s uns sogaa bequem
Als frummer Bischof mol beim liewe Gott.

Wie steht’s nooch finfezwansich Johr?
Hot jeder soi Prognos erfillt,
Wie a(n)g’saacht ach genitzt die Zeit?
Nä, känner! Un märr kummt’s grad vor,
Wie wann die Junge wär’n zu wild
Un jetzert mär die g’scheide äldre Lait!

Mit Wehmut denk ich an die stolze Plä(n) serick:
Ehr Scheidre war am End fär Daitschland doch e Glick!

*) Aus: Albert H. Keil: Hunde vor de Herze,
© 1997 by Verlag PfalzMundArt, Dirmstein, ISBN 3-921 395-34-8