Verlag PfalzMundArt - Därgemer Mischtstick

Därgemer Mischtstick *)

Von Albert H. Keil

Dass diejäniche, wu die Umwelt ve’dreggen, däss nooch un nooch an ehrm Geldbaidel spiern, dodra(n) gewähnt märr sich allmählich. Un strenggenumme isses noch viel sewännich – warum brauchen dann zum Beispiel die Raacher nät ehr Kibbe uffsehewe, hä? Najerdings awwer muscht dich sogaa rechtferdiche, bloß weil d’ doiner Umwelt äbbes Gudes duhe willscht!

Do hot doch die Krääsve’waldung in Därgem e najes Formular rausgebroocht. Dodemit kann änner, wu soin „grine“ Abfall selwert komboschdiere dut, e Gebihreermäßichung bea(n)traache. Dass märr noot g’froocht wärd, ob märr iwwerhaupt en Gaade hot un wie groß er is, dodegeche haw ich jo gaanix. En Hammer is awwer schunn, dass unsern Amtsschimmel en normale Komboschthaufe kaum in Betracht zieche dut – ‘s geht glei um en „Komboschtbehälter“. Un färs Beantworte vun de reschtliche Punkte sollt die Krääsve’waldung wärklich e Froochebooche-Ausfillseminar an de Volkshochschul oirichte:

Do muscht a(n)gäwwe, warum d’ komboschdiere willscht un fär was du doin Komboscht ve’wende meggscht – wie wann die Birokrade sich nät denke kännden, was märr mit Mischt a(n)fangt! Sie ve’langen Auskunft, was d’ uff den Haufe schmeischt un was nät. Un endlich dun se dich frooche, was d’ mit dem Abfall maggscht, wu d’ nät komboschdiere kannscht! Komisch – vun ämm, wu all soin Mill korzerhand in die schwarz Tonn steckt un schä(n) dodefor bezahlt, wollen se nix dergleiche wisse...

Wa’ märr den g’samte Froochebooche ausg’fillt hot, dann hett märr eichentlich e Diplom ve’dient. Awwer wännigschdens wärd de Krääs Därgem e naji Beamtestell finanziere – odder määnen ‘r, de Landrot rääst selwert dorch die Geechend als „Komboschthaufe-Inschpekder?“