Sonett von Albert H. Keil

9. Preis beim Mundartdichter-Wettstreit Gonbach 1992

Wus Bächel glei am Dorfrand fließt,
Hett gärn ich, wann ich dot mol bin,
Moi Grab im alde Wingert drin,
Weil rund’rum alles wachst un sprießt.

Wie sich im Winder ruh’n die Räwe
Vum Treiwe, Blihje, Reife aus,
So kännt, deet liche ich do drauß,
Ach ich ve’schnaufe vu’ moim Läwe.

Un wann im Herbscht de naje Rode
Läwendich rauscht un spritzt im Fass,
Voll Summerfräd un Sunneglut,

Erinnern aich als an den Dode,
Zu soim Gedenke hewens Glas
Uff Läwensluscht un leichdes Blut!

*) Aus: Albert H. Keil: Hunde vor de Herze,
© 1997 by Verlag PfalzMundArt, Dirmstein, ISBN 3-921 395-34-8