Von Albert H. Keil

3. Preis beim Mundartwettbewerb „Dannstadter Höhe“ 1997

En Schadde is am Lärmschutzwall
Im Duschbre vor mär riwwerg’huscht,
En Vochel, u(n)daitlich un schnell.

E Raachfahn iwwer Frankedaal,
Mit schwarzer Dinde hi(n)geduscht
Uff rosarodes Aquarell.

Doi Ärwet ist nät grad doin Fall?
Du meggscht gärn annerscht, wie d’ hait muscht?
Sei glicklich doch – du hoscht e Stell!

Am Stroßerand en Kinnerball
Macht richdich ämm uffs Spiele Luscht.
Im Oschde werd’s allmählich hell.

Die Sunn geht uff, ora(n)sch un prall,
Die Amsel singt aus voller Bruscht.
En naier Daach steht uff de Schwell.

*) Aus: Albert H. Keil: Hunde vor de Herze,
© 1997 by Verlag PfalzMundArt, Dirmstein, ISBN 3-921 395-34-8