Zum hunnertschde Gebortsdaach vun de Edith Stein¹)

Von Albert H. Keil

2. Preis beim Mundartwettbewerb „Dannstadter Höhe“ 1999

En Zuuch rollt noi nooch Schifferstadt,
Nooch Oschde geht die Fuhr.
Was wohl uff die, wu drin sinn, waat?
Kummt änner mol reduur?

En Zuuch bremst ab in Schifferstadt.
‘s schwebt raus im Aacheblick
En Zeddel wie e welkes Blatt.
Ve’geht, ve’weht so Glick?

En Zuuch halt korz in Schifferstadt.
Den Zeddel hebt wer uff
Un streicht ‘n ganz ve’stohle glatt:
En letschder Gruß steht druff.

En Zuuch ruckt a(n) in Schifferstadt.
Der Zeddel wärd ve’knillt
Un fallt – dorch Zufall? – unners Rad.
De Himmel sich ve’hillt.

En Zuuch rollt naus aus Schifferstadt,
Nooch Oschde geht die Fuhr.
Uff die, wu drin sinn, Auschwitz waat.
Kaum änner kummt reduur.

¹) Der jüdisch-katholischen Nonne und Philosophin Edith Stein (1891–1942)
gelang es auf dem Transport in die Gaskammer von Auschwitz, in Schifferstadt
einen Zettel aus dem Zug zu werfen mit Abschiedsworten an ihr Kloster in Speyer.
1998 wurde sie von Papst Johannes Paul II. heiliggesprochen.

*) © 1998 by Verlag PfalzMundArt, Dirmstein