Von Albert H. Keil

1. Preis beim Mundartdichter-Wettstreit Gonbach 2003

Wann se die Äärm noch owwe streckt,
Als mol nooch rechts un links sich dreht,
Wärd äbbes in moim Herz geweckt,
Ach wann moi Härn froocht: „Bisch dann bleed?“

Ehr Frihgimnaschdik g’fallt märr gut.
Wie se die Äärm schwenkt kraiz un quer!
In moine Ohre drin rauschts Blut,
Schunn halt moi Fraa mich fär’n Voyeer.

„So schlank un groß, so strahlend schä(n)!“,
Staun ich am Fenschder, bin ganz hi(n).
Do spott’t moi Fraa, ich wär’ se klä(n)
Fär so e Trumm wie driwwe die!

Ich wääß, ‘s bringt roinschdi Energie,
Wann sich bei däre äbbes rihrt,
Mit Leichdichkeit un uhne Mih
Wärd viel aus wennich produziert.

Die Äärm gehn nunner un gehn nuff,
Sie schlenkert se de ganze Daach.
Jetzt awwer wach vum Traam ich uff
Un sähn die riesich Winda(n)laach...

*) © 2003 by Verlag PfalzMundArt, Dirmstein

Veröffentlicht u. a. in:
Literarischer Verein der Pfalz e. V. (Hrsg.): Neue Literarische Pfalz (NLP), Nr. 48 (2022).
Landau 2022, S. 55.