Von Albert H. Keil

Anerkennungspreis beim Pfälzischen Mundartdichterwettstreit Bockenheim 2005

Blohe Veilcher... Hell doi Lache –
Wie die Trääm vum große Glick:
Ausm Läwe äbbes mache,
Vorwärts gucke, nät serick!

Rode Rose... ‘n weiße Schleier,
Glocke laiden Zukunft oi.
So e schäni Hochzichfeier –
Ich bin doi, un du bischt moi!

Rosa Nelge... Schluss mit Schmerze,
Drauß vorm Fenschder singt de Wind:
Jetzt schlacht näwer unsre Herze
Noch e klännes vumme Kind!

Gäle Dahlie... Große Sorche,
Herbscht sich in de Summer schleicht.
Was wohl bringt de neggschde Morche,
Wu sich blääch am Himmel zeicht?

Weiße Aschtre... Dunkle Eiwe,
Schadde, Kieswääch un e Bank.
Ewich mecht ich sitze bleiwe,
Saach ‘m Herrgott fär dich Dank.

*) © 2005 by Verlag PfalzMundArt, Dirmstein