Von Albert H. Keil

6. Preis beim Mundartdichter-Wettstreit Gonbach 2009

wie märr uns kennegelernt hänn
vor viele johre
hämmer uns am himmel
unsern stern rausg’suucht
de schännschde vun all

erscht wollt ich därr’n runnerhole
awwer du hoscht g’saacht
lossen drowwe
dort wärder gebraucht
nät do hunne

noot wollt ich dich nufftraache
uff unsern stern
awwer du hoscht gemäänt
ich will do hunne bleiwe
do owwe wärr ich nät gebraucht

die sunn war hääß am daach
un naachts war’m mond soi licht so kalt
dasses em g’schuckert hot
bloß unsern stern
hot e läwe lang gleichmäßig g’funkelt

wann ich hait zu’m nuffguck
mään ich jedes mol
du deetscht märr zuzwinkere
un ich heer als sogaa doi stimm:
uff unserm stern do howwe
do halt ich därr e plätzel frei

*) © 2009 by Verlag PfalzMundArt, Dirmstein