Von Albert H. Keil

3. Preis beim Sickinger Mundartdichter-Wettstreit 2019

Kennegelernt im Bah(n)hof
vor däre brääde gääle Dafel.
Ä(n) Stunn zamme im Kúbbeh g’hockt.
Die zwä Fah’kaade hämmer uffg’howe.

Noot bischt drei Johr lang
beinoh jedes Wocheend
middem Zuuch zu märr g’fahre.
Doi Fah’kaade hoscht g’sammelt.

Zu unsre Hochzich hoscht märr
so e klännes Album g’schenkt.
Do war’n awwer kä(n) Foddos noigeklebt,
nä(n), hunnertfuchzich Fah’kaade.

Wehrn’ de Eh hämmer kaum Zuuch fahre gemisst,
weil märr erscht e klännes Audo kaaft hänn
un speeder, wäche de Kinner, e greeßeres.
Fah’kaade warn känni uffseheewe.

Däss Album hot Johre im Biecherschank g’stanne.
Färr die Fah’de mit dänne ganz große Audos –
erscht weiß mit rodem Kraiz un noot schwarz –
war’n dann kä(n) Kaade mäh needich.

Un weil ich doi Sunndaags-B’suuche
dief drin in moine Erinnrung habb,
brauch ich ach däss Album nimmi
un gäbb därr’s mit nunner...

*) © 2019 by Verlag PfalzMundArt, Dirmstein